اعقل مجنون بقلم ريناد يوسف
اعقل مجنون
جريت بكل سرعتي من العيال اللي عماله تزقل فيا بالطوب ويزفوني الزفه المعتاده اللي بيعملوهالي كل مايشوفوني في الشارع ويفضلوا يزعقوا بعلوا حسهم ويقولولي.. العبيط اهو.. جوده العبيط.. جوده العبيط.. فضلت اجري لغاية ماسبقتهم بمسافه ووصلت عماره دخلت فيها وإستخبيت منهم، ووصلوا هما لاخر الشارع يدورو عليا ولما ملقونيش رجعوا تاني.
قعدت شويه اخدت نفسي واتاكدت انهم مشيوا وان مفيش حد في الشارع وطلعت من العماره بتسحب لغاية مامسكت الشارع الرئيسي وفضلت اجري بسرعه اوي عشان محدش من العيال ولاد الكلب دول يشوفني ويلم باقي العيال ويلحقني،
وفضلت ماشي لغاية ماوصلت بيتنا.. بيت اهلي.. اللي فيه أمي سعاد المفتريه واخواتي البنات.. واول مادخلت قلعت شبشبي وحطيته علي طربيزة السفره ودخلت اوضتي ونمت عالسرير من غير مااغسل رجليا عشان اغيظ الوليه سعاد امي واوسخلها الدنيا.. اصل انا بحب اشوفها مدايقه.
نمت علي السرير وشويه وسعاد فتحت الباب ودخلت منه وهي شايله اكل وحطته علي السرير جنبي وقالتلي:
قوم ياجوده عشان تاكل.. قوم احسن اخد الاكل تاني وامشي.. انا كنت جعان.. بس مرضتش اقوم.. وقولت جوده مش هيقوم ياكل غير لما سعاد المفتريه تمشي من جمبه.. وفعلا سعاد المفتريه مشيت وجوده قام ياكل.. ابتديت أكل وشويه وافتكرت لما كانت مراتي حبيبتي تطبخلي اكل حلو وتأكلني فبوقي هم زي الأطفال.. ضحكت وجريت رفعت المرتبه وطلعت صورتها.. وجبتها حطيتها قدامي.. وبقيت اكل معلقة رز ومعلقه امدهالها قدام بوقها.. بس هي مكانتش تفتح بوقها ولا تاكل الظاهر انها لسه زعلانه مني.. مع اني اتخانقتلها مع سعاد المفتريه ومع اخواتي وضربتهم عشانها.. بس هي الظاهر ان دا مخلهاش ترضي عني.. فضلت باصص للصوره كتير لغاية ماعيوني دمعت وانا بفتكر كل حاجه مرت عليا ورجعت بالذاكره لسنين فاتت..لبداية الحكايه
الحكايه اللي بدأت من ٥ سنين بالظبط.. من ساعة مااكتشفت أن فيه تلاعب في الشركه اللي انا شغال فيها ومن الناس الكبار اللي فيها.. والوحيد اللي هيلبس الليله دي هو العبد لله..ودا لأني مدير الحسابات في الشركه، والمسئول عن اي عجز او حاجه تخص ايرادات الشركه.. الميزانيه السنويه والجرد كان فاضل عليهم ٤ شهور.. ووقت مايحصل انا هروح في ستين داهيه.. فرجعت البيت وقعدت مع مراتي حنين وحكيتلها كل حاجه.. وهي ياحبيبتي اتجننت من الخوف والقلق والتوتر زيي بالظبط.. وفضلنا نفكر لغاية ماوصلنا لحل شفنا انه الوحيد اللي هيخرجني من الورطه دي.. وهو إني امثل اني عملت حادثه وفقدت الذاكره او ان الخبطه اثرت على دماغي واتجننت.. وفعلا تاني يوم رميت نفسي قدام عربيه قدام الشركه اللي بشتغل فيها وعملت انها صدمتني صدمه جامده وفضلت اتألم.. مع أن العربيه كانت مهديه اساساً.. بس اللي ساعدني إن اللي كانت سايقه العربيه وحده ست فماخدتش بالها أنها كانت مهديه من كتر مااتوترت وخافت.
وانطلت الخدعه على الكل وولاد الحلال نقلوني المستشفي والشركه كلها عرفت بالحادثه.. وهناك عملت اني فاقد الذاكره ومش فاكر حد ولا فاكر حاجه.. والدكاتره عملوا تقرير بحالتي.. وجات مراتي وامي واخواتي البنات عشان ياخدوني من المستشفي وحالتهم كانت حاله وكلهم كانوا بيبكوا ومتأثرين.. بس طبعاً مراتي عارفه اللي فيها فكانت اكتر وحده ثابته فيهم ومش متأثره.. ودا خلي الكل كان مستغرب من موقفها.
طبعا انا عملت اني ناسي كل حاجه بما فيهم اهلي ومش فاكر هما مين ولا عارفهم.. واخدوني للبيت وانا مستمر في تمثيل اني فاقد الذاكره..
ولما قعدت انا ومراتي لوحدنا وبحثنا في الموضوع.. لقينا ان فقدان الذاكره لوحده مش سبب يعفيني عن أني اتحاسب علي عمليات الاختلاس اللي تمت في الشركه دي كلها.. فشفت ان افضل حل اني امثل اني مجنون.. ولازم الكل يصدق اني مجنون.. وكانت الانطلاقه من عند مراتي اللي خرجت لاهلي تستنجد بيهم وتقولهم اني بقيت بعمل حاجات غريبه واتكلم كلام غريب.. كلام ناس مجانين..وخرجت عليهم بعدها وانا ماسك عصاية المقشه وعاملها رشاش وعملت اني جندي فالحرب وبحارب في الاعداء وكل اللي اوجهله طلقه منهم لازم يعمل نفسه ميت والا اروحله بالعصايه واضربه.. وابتديت بمراتي وعملت معاها الحركه دي ولما ماماتتش من اول طلقه رحت اديتها ضربتين بعصاية المكنسه علي جسمها وغزيتها بيها بتمثيل وانا بقولها اخلصي موتي.. وهي وقعت عالارض بتمثل انها ميته.. وبمجرد ماوجهت العصايه علي امي واخواتي كل اللي اعمل نفسي بضربها بالنار كانت بتقع ميته فوراً بدون تردد عشان تتجنب الضرب بالعصايه ههههههه
كان شكلهم وخوفهم بيضحك بس انا مسكت نفسي للنهايه.. وبعدها ابتدت مراتي تزيع في العماره اني اتجننت بعد الحادثه.. والكل صدق والخبر اتشاع وخصوصاً اني ابتديت اعمل حركات مخيفه واتكلم كلام غير منطقي مع سكان العماره واجري ورا العيال الصغيره.. ودا خلي الكل اتاكد إني مجنون رسمي.
واخدتني مراتي لدكتور نفسي وبعد الكشف عليا وتمثيلي المتقن، كتب تقرير اني مش فكامل قواى العقليه، واني فقدت الاهليه وغير واعي لتصرفاتي.. ومسكنا انا وهي التقرير فأدينا وروحنا، وكانت فرحتنا متتوصفش زي المتهم اللي بقي فأيده دليل برائته..
وتاني يوم مراتي راحت الشركه اللي شغال فيها وقدمت استقالتي وكان عشان يتوافق عليها لازم يحصل جرد في الاول.
وحصل الجرد والعجز اتكشف واتحولت للمسائله القانونيه بتهمة الاختلاس.. ولكن التقارير اللي تفيد أني مجنون خلت النيابه حولتني لمستشفي العباسيه الحكوميه للكشف عليا واثبات صحة التقارير اللي معايا من عدمها.. ودخلت المستشفي وكملت تمثيلي للاخر.. والدكاتره هناك عملوا تقرير بأني مجنون فعلاً.. وبكده بقيت مجنون رسمي.. واتحكم عليا بعشر سنين سجن مع ايقاف التنفيذ.. مع مراعاة تنفيذ الحكم في حالة تحسن حالتي العقليه.
يعني بكده اتحكم عليا طول العمر.. يأما اعيش بين الناس مجنون.. او السجن عشر سنين.. فأخترت اني افضل امثل الجنون للأخر.
ولكن حصل بعد كده اللى مكنتش اتخيله.. واللي خلي نظرتي للدنيا ولكل الناس تتغير حتي اقرب الناس ليا.
انا طبعاً بقيت فنظر الكل فاقد الذاكره ومجنون كمان.. فالكل ابتدا يكشف اوراقه قدامي من غير خوف.. اولاً اصحابي ونفاقهم واكتشافي انهم كانوا بيعرفوني مصلحه، والكلام دا كانوا بيقولوه قدامي صريح لما كانوا يتجمعوا في بداية جنوني المذعوم ويجوني البيت زياره..ويفضلوا يهزروا مع بعض ويضحكوا وهما بيوصفوا اد ايه انا انسان عبيط وأهبل.. والصدمة بقي لما لاحظت أن فيهم اللي عينه زاغت علي مراتي، وقدامي يبصلها بحسره ويقول للباقيين.. مش خساره الجمال دا كله يتحكم عليه بالاعدام مع واحد زي جوده المجنون.. هي من الاول وانا مستكترها عليه بهبل امه دا فمابالكم بعد اللي حصله.
ودي كانت اولى صدماتي.
أما الصدمه الكبيره بقي أو خليني اقول الضربه الكبيره.. فجاتني من اقرب الناس ليا.. أمي واخواتي البنات اللي معداش غير كام شهر وابتدت نواياهم تبان.. وابتدوا يخططوا قدامي انهم ياخدوا فلوسي اللي في البنك وأملاكي.. وغير كده ابتدا تخطيطهم انهم يكرهوا مراتي في البيت ويخلوها تسيبني وتطلب الطلاق عشان متاخدش من فلوسي ولا مليم ولا تقاسمهم فأي حاجه.
كنت براقب كل دا وانا مصدوم فيهم ومش قادر استوعب..وابص لمراتي بشفقه وهي بتاخد منهم الشتايم والإهانه واسأل نفسي هما ازاي بيجيلهم قلب يعملوا كده عشان الفلوس فوحده عمرها مااذتهم بحاجه ولا جرحتهم بكلمه حتي، وشايلاني وشايلاهم علي كفوف الراحه وبتخدم الكل برموش عنيها.. بس اكتشفت انهم بيعاملوها كده من زمان بس هي حبيبتي مكنتش بتقولي اي حاجه عشان متدايقنيش ولا تعمل مشاكل بيني وبينهم.
حسيت أن كل الاقنعه اللي حواليا سقطت وابتديت اشوف كل الناس على حقيقتها.
كأن عيوني كان عليهم غشاوه واتشالت.
قررت إني آخد مراتي وابعد عن كل الناس.. وابتديت افكر اني ابيع كل حاجه امتلكها بتاريخ قديم واخد فلوسها واعيش انا ومراتي فمكان بعيد عن اي حد ونخلف طفل ونربيه وسطنا احنا وبس ومنخليهوش يعاشر الناس الوحشه دي.
لكن للأسف قبل مادا يحصل أمي واخواتي البنات انهو حياة حنين مراتي.. طبعاً الواضح للكل انها كانت حادثه.. بس انا الوحيد اللي متأكد انها مقصوده وان موت مراتي مكنش حادثه ابداً.
ودا حصل لما استغلوا اني نزلت من البيت اقعد على القهوه شويه.. ومسكوا حنين اتخانقوا معاها.. وزقوها خلوها وقعت علي الطربيزه القزاز ودخلت حتت قزاز كبيره فضهرها، ودا غير اللي دخل في رقابتها وخلاها بعد مانقلتها المستشفى على طول.. ولما البوليص حقق معاهم قالوله انها اتزحلقت ووقعت علي الطربيزه.. وعشان مفيش اي اثار عنف علي جسمها يدل ان حد ضربها فاستبعدوا ان الحادثه تكون بفعل فاعل.. حتي بعد ماانا اتهمتهم بقتلها وحكيت اللي كانوا بيعملوه معاها.. لكن طبعاً مين هياخد بكلام ولا شهادة مجنون وجنونه مثبت بالاوراق الرسميه.
وماتت حبيبتي ومراتي وانيستي واقرب واحب حد ليا في الدنيا.. واتقفل المحضر علي ان موتها مجرد حادثه.. واتقفلت معاه صفحة حياتها وانمحت من الدنيا.
رجعت البيت وانا مش طايق حد من اللي فيه وابتديت اكسر كل حاجه فيه ومسكت اخواتي البنات ضربتهم لما شفيت غليلي منهم.. أما امي فمقدرتش اضربها زيهم لانها للاسف مهما كانت أمي.. بس دعيت عليها فسري كتير اوووي.. وطبعاً كل اللي عملته دا اتفسر علي انه نوبة جنون عاديه ومحدش ابداً لام عليا فيه.
بس عرفت ساعتها الطريقه اللي هحرق بيها قلوبهم.. هما مش موتوا مراتي عشان الفلوس.. انا بقي هحرمهم من الفلوس ومش هخليهم يطولوا مليم احمر منها.. نفذت خطتي اللي كنت بفكر فيها قبل موت مراتي، وبعت كل حاجه امتلكها بتواريخ قديمه واخدت فلوسها ورحت اجرت خزنه في البنك وحطيتهم فيها.. بس قبل كده عملت من الفلوس دي صدقه جاريه علي روح مراتي.
وهما اتجننوا لما عرفوا مع الوقت باللي حصل.. واني مبقاش حيلتي حاجه.. وطبعاً اتهموا مراتي انها هي اللي اخدت كل حاجه قبل ماتموت.. وفضلوا يدعوا عليها ويشتموا عليها طول الوقت.. وانا كنت بتفرج عليهم وسايبهم.. وبقول خليها تاخد من حسناتهم مع انها مش محتاجه حسنات.. واظن ان اللي زيهم معندهمش حسنات عشان حد ياخد منها.
وقررت إني اكمل حياتي وانا مجنون.. مجنون بس شايف الدنيا والناس صح.. مجنون بيعمل اي حاجه نفسه فيها من غير ماحد يلومه او يعاتبه او يحاسبه علي تصرفاته.. بياخد حقه وقتي والناس بقت تخاف منه وتعمل لجنانه الف حساب وتتجنبه.. وعشت مع امي سعاد المفتريه.. اه صحيح نسيت اقولكم ان دا بقي اسمها ولقبها الجديد واللي مش بقولها غيره.. وبطلت اقولها كلمة امي دي خالص.. وبقيت اسوق عليها الهبل عالجنون وبقت مضطره تعاملني معاملة الاطفال وتصرف عليا زيي زي اخواتي البنات.. ودا عقاباً ليها عاللي عملته عشان الفلوس.. انها تفضل طول عمرها تهتم بيا.. وهفضل علي قلبها مع اني مش طايق ابص فوشها ولا وش اخواتي وكل مااشوفهم افتكر اللي عملوه فمراتي وبنت قلبي.
وادي حكايتي وقصتي ومأساتي.. وازاي الطمع فاللي عندي ومعايا خلوا كل اللي حواليا يأذوني.. سواء كانوا قريبين او اغراب.. واكبر اذيه ليا كانت من اللي مني.. واتمنيت من كل قلبي أني افقد الذاكره أو اني اتجنن بجد عشان انسي واتخطي كل دا.. عشان انسى وجع قلبي علي مراتي اللي راحت غدر.. اد ايه اتمنيت وانا بحط راسي ع المخده اني اصحي الصبح ناسي كل حاجه وناسي علاقتي بكل الناس.. لكن للاسف دا مبيحصلش.. وليس كل مايتمناه المرء يدركه.. وتقبلت اني هكمل حياتي علي نفس النمط.. اجن عاقل وفنفس الوقت أعقل مجنون.
تمت
بقلم ريناد يوسف.
لقراءة اسكربتات مجمعه