رواية نفق الجحيم الجزء الثاني اقتباس بقلم ريناد يوسف
روايه نفق الجحيم الجزء الثاني اقتباس بقلم ريناد يوسف
نفق الجحيم الجزء الثاني اقتباس بقلم ريناد يوسف
نفق الجحيم الجزء الثاني
اقتباس من الاحداث
أبو دراع باصصلها بغضب الكون كله وبنبرة تحمل كل انواع اللوم والعتاب قالها:
ليه تعملي إكده ليه.. ليه تخلينا نوقعو في المحظور، يعني عاجبك اللي حوصول ديه يابت الناس، عاجبك اللي جرالك بسبب جلعك الماصخ؟
ردت عليه بكل دلع وهي عتزيح الغطا من عليها وتتمطع بدلال:
إيوه عاجبني، وعاجبني قوي كمان، وكان عاجبك انت كمان عشيه ولساه عاجبك لدلوك بس عتكابر وتقاوح، شفتها فعينك وحسيتها فأنفاسك، كنت راغبني بكل جوارحك ومش مصدق حالك اني بين اديك.. حالتك كانت حاله وماصدقت ان اني خدت الخطوه اللي انت مقادرشي تاخدها بقالك سنين. كنت بس تبص وتتمني ومعندكش اي جراءه، مع ان ابو دراع عمره ماكان جبان ولا حد فيوم شاف خوفه وتردده- الا اني- بس اللي شفتهم وشفت منك اللي محدش شافه، وعرفت اللي جواك واللي ماحد عرفه ولا قرب منه غيري.. وأوعاك تحملني غلط اللي حوصول لحالي، عشان انت كمان كانت ليك الغيه اكتر مني.
ابو دراع رد عليها بقلة حيله:
بقالك شهر بحالو عتتحنجلي حواليا وتاجي فرشتي فنص الليل وتنامي جاري ولاصقه فيا كيف جلدي، وتلبسي وتغيري وتبدلي وقدام عيني، وتتدلعي وتتقصعي واني قاومتك وصديتك على كد مااقدر بس في الاخر كنتيلي كيف حوا اللي وسوست لادم ووقعته في المحظور وطلعته من الجنه، واني واحد خطى الاربعين من غير مااقرب ناحية مره ولا مره تقرب مني وغصب عني ضعفت.
ردت عليه بكل دلع ودلال:
بذمتك اللي كنت فيها كانت جنه؟ واللي كنا فيها انا وانت عشيه كانت ايه عاد ياقطب؟
قالتها وغمزتله خلت الكلام مات علي شفايفه وبلع ريقه وهو عيتطلع لعيونها الوساع اللي عمرهم مافشلو انهم يخربطو احواله بس يتطلعلهم، وهي كملت بجديه لما لقته اتراجع:
قطب..مسمعش منيك كلمة وقعنا في المحظور داي مره تانيه عشان انت مش مرافقني ولا اني وحده جيالك من الشارع، اني مرتك وحلالك وانت حلالي، ومن اليوم وطالع هنعيشو كيف اي راجل ومرتو، في النهار تاخدنا مشاغل الدنيا ويفرقنا السعي عالمعايش، بس في الليل تجمعنا فرشه وحده وموطرح واحد وكل واحد فينا يرمي تعب يومه على صدر التاني ويشكيله اللي مكدر قلبه ومعكر صفو باله سامعني.. وكملت بدلع
ودلوك.. اني كنت عروسه عشيه والنهارده صباحيتي، وعايزه افطور فطور عرايس، هاه قولي استاهل افطور حاجه زينه ولا مستاهلش؟
اتنهد ابو دراع وابتسم ابتسامه مقدرش ابدا يداريها مهما حاول، وبرغم انه مردش عليها وقام طوالي دخل الحمام الا انه رد عليها في سره وقالها:
كيف ماتستاهليش ياغزالة البراري انتي، وان مكنتيش انتي تستاهلي الحلو والزين كلو اللي في الدنيا امال مين اللي يستاهل عاد؟
خلص سبوحه وطلع من الحمام وهو عيلبس خلجاته ووقف قصادها وهو شايفها حطت راسها تاني عالمخده وغفيت، فقرب منها وقعد جارها بهداوة ومد يده شال خصلات شعرها من علي وشها وقرب منها طبع بوسه حانيه فوق خدها وهمسلها جار ودنها بنبرة صوته اللي عتعشقها..
خربطتي حال العابد الناسك وغويتيه بتفاح خدودك ياحوا جات لآدم فآخر عمره وعلمته الغوايه، وقدرت عليه وعملت اللي رجاله بشنبات مقدرتش تعمله، غلبتيني وغلبتيني، وطلعتي ضعفي اللي كان مدفون وماحدش عمره شافه ولا عرف بيه..اااخ منك اااخ يافرح جاي للقلب فآخر خريفه.
خلص كلامه وقام فتح جذدانه وخد فلوس، وطلع راح عالسوق وجابلها كل حاجه عارف انها عتحبها وجابلها فطور يليق بأحسن عروسه في الدنيا، فطور يليق بعروسة ابو دراع ومرته وأول فرحته، واللي على يدها داق طعم السعادة وعرف طريق النعيم.
اما هي فمن بعد مامشى واتوكدت انه راح من قفلة الباب اللي سمعتها، فتحت عنيها بشويش وضحكت بفرحه وهي عتفتكر منظره عشيه وهو دايب فيها وطاير من السعاده فحضنها، مع انه لاخر لحظه كان يقاوم وخايف ينقض العهد،
بس من جواه كان عيهمسلها زيديني محبه وقرب، واياكي تسمعي كلامي وتبعدي،
وهى سمعت صوت قلبه ونفذت اوامره اللي جات على مرامها، أما لسانه واللي عيقوله فماداتهوش اي اهتمام، لانها عارفه انه كداب، والكدابين مابيتاخدش حكيهم بعين الاعتبار،
وادي لسانه اعترف من شويه باللي كان عيداريه عشيه وكل شي انكشف على عينك يامُحب.
**************
-انتي تخرسي خااالص، عشت عمر واني صابر عليكي وكاتم فقلبي وساكت، رضيت باللي مفيش راجل غيري يرضى بيه ولا يتحمله، حطيت مراكيب الدنيا فخشمي عشان محدش يشمت فيا ومع ذلك لا عينك عمرها اتكسرت ولا حاسه انك عملتي اي حاجه غلط وبجحه بجاحة الدنيا كلها.
_وايه اللي جابرك انك تكتم فقلبك وتسكت يانن عيني.. ماتحكي وتقول وتتكلم مين ماسك لسانك، قول عشان كل الخير اللي عتتمرمغ فيه ديه اشد بساطه من تحت رجليك واخليك تقع فبركة وحل الفقر وتغطس فيه لودانك.
قول واني اخليك ترجع من مقاول كد الدنيا لسواق لودر معفن يقعد يعبي ويفضي بسطل اللودر طول النهار لما الشمس تقور نافوخه بكام مليم يمد يده ياخدهم اخر النهار كيف الشحاتين.
افتح خشمك واني اعبيهولك تراب واخلي كل اللي شغال تحت يدك دلوك وماشي بامر منك بما فيهم خواتك يدوسو عليك بمراكيبهم بس يشوفوك وقعت،
وانت اللي مستني وقعتك كتير وانت خابر زين.
وبعدين حتي لو اتكلمت ولا فتحت خشمك وقلت وعدت، الحكايه قدمت وعدى عليها سنين ومحدش هيصدقها دلوك.. كله هيتهمك بالهوس والعبط وان عقلك جرتله حاجه. اعمل مابدالك واني كمان هعمل مابدالي ونشوفو مين اللي هيطلع في الاخر خسران من غير التاني.. اني فلوسي واللي معاي وحسبي ونسبي يجوزوني سيد سيدك لو هملتك، شوف انت عاد لو اني سبتك هتروح فين وتاجي منين وتعمل ايه فحالك، ويكون فمعلومك لو طلعت من البيت ديه رجلي على رجل عيالي مههملهمشي،
ولو خدتهم واتجوزت راجل غيرك اياك تفكر انك هتشوف ضافر واحد منهم ولا عينك هتنضره، واني قولتها وانت خابر اني كدها..اني كلمتي وحده.
-وعينك بيضه، وقويه وملكيش كبير ولا ليكي رداد ولا حداكي رجاله كلهم حريم من كبيرهم لصغيرهم، وعمرك ماشفتي الربايه ولا الحيا عرفلك طريق.
_ماشي.. فيه حاجه تانيه عايز تقولها ولا تنقلع من قبال وشي عشان ماازعلكش مني؟
بصلها بقرف وهملها وطلع وهو متحلف للي جايلها عيني عينك فقلب داره وهي معملتش حساب لأي حد وكانت هترجع الود القديم لولا ماربنا بعتلهم اللي قطع عليهم خلوتهم،وكشف زناختهم.
*****************
قومي خشي الموطبخ اعملي الوكل البنته تعبانين واني عنيا واجعاني مهتحملشي دخان الكانون.
_ معملاشي وكل وخشي صحي بناتك يعملو الوكل دا لو عايزين تاكلو يعني، معاوزينش انتو احرار خليكم نايمين انتي وبناتك.
خلصت كلامها ودخلت عالأوضه بتاعتها وقلعت طرحتها وقعدت على الكنبه تاخد نفسها من التعب اللي حالل على كل بدنها، ورفعت عنيها عليه تتفحص حالو وشافته كالعاده عينه عليها ومراقبها وساكت، مكلمتهوش وخدت نفس طويل متعوب وزفرته، وقامت لما لاقيته مد يده عيحاول يتلافى القله يشرب بس مطايلشي،
راحت جابتهاله وقعدت جاره ورفعت دماغه على دراعها وبيدها التانيه سقته، وبعدها رجعت القله مكانها ونزلت دماغه تاني عالمخده وهي شايفه ابتسامته وفرحته المعتاده فكل مره تقرب منيه وتعمله حاجه، وخصوصي وهي عتسنده وتسقيه اكتر من ٥٠ مره في اليوم ومتعرفش سر عطشه الكتير ديه ايه؟
ولساها هتتحرك من جاره سمعت صوت بطنه عتعمل صوت من الجوع، بصتله تسأله بعنيها وهو حط يده علي بطنه وبص بعنيه بعيد عنها كيف مايكون خجلان من صوت جوعه اللي فضح حاله قدامها.
ومن غير كلام هي فهمت عليه وطلعت من الاوضه وراحت على الموطبخ وابتدت تعمل وكل وهي عتسب وتلعن فأمه واخواته البنته اللي حتي المريض العاجز معيشفقوش بحاله ولا يحنو عليه، والتانيه بمجرد ماشافتها رايحه عالموطبخ اتبسمت بنصر ونشوة، واستنت الوكل اللي هياجيلها عالجاهز، لكن كل عشمها كان عشم ابليس وهي واعياها طالعه بصحن واحد ورغيف عيش وداخله بيه على اوضتها وقفلت بابها عليها، ولما دخلت الموطبخ بعدها ملقتهاش عامله غيره ولا بداله وكل!
طلعت من الموطبخ وهي قايده نار ومصدقت شافت جوزها دخل من باب البيت وراحت عليه جري تشكيله وتبكيله منها، وهو صدها بعنف وقالها:
عقولك ايه همليها فحالها واوعاكي تختلطي بيها ولا تديقي خلقها؛ عشان هي اللي فاتحه البيت دلوك، ولو حملت حالها وخدت بعضها وهملتلك البيت من مكايدتك ومضايقتك ليها انتي وبناتك الوكل اللي مراضياش تقومي تطبخيه لا انتي ولا بناتك هتتمني يكون فبيتك وهتشتهييه وماتلاقيه..
وخصوصي ان واحد من رجالتك راح وواحد اتشل والارض اللي حيلتنا بعناها وعالجناه بيها على كد مانقدرو وبرضك قعد على حاله، وبقينا على فيض الكريم.. لمي نفسك وطلعي بناتك يعملو الطفح اللي هتطفحيه انتي وهما،
وهاتيلي اي حاجه اتسممها عشان ارجع الدكانه بدال ماتروح مني الزباين لما يقصدو الدكان وميلاقوشي حد فيه.. الدكان بتاعها اللي فاتحاه بفلوسها هاااا، واخده بالك انتي.
بصتله وسكتت ومردتش عليه وراحت عالموظبخ من سكات تجيبله وكل، بعد مادورتها فمخها وشافت انها لازمن تتخلى عن دور الحما اللي عتتمنى تمارسه عليها من اول يوم دخلت فيه البيت ومعارفاشي، ولا شكلها هتعرف.
**************
-قوم ياغالي خد الينسون ديه اشربه هيدفي صدرك ويخفف عنك الكحه اللي طول الليل عتخليك تبيت تنبر من نص حِشاك وعينك معتغمضش
_مهيعملشي حاجه ريحي حالك، كام ينسون عملتي وكام دوا شربت وكام ابر خدت ومفيش فايده، كنه هو السل اللي عيقولو عليه ديه واللي بسببه هيخلص اجلي بس محدش عايز يقولي..اني حاسس بحالي الجته اتسلت، والحيل باد والكحه عتطلع بالروح لغاية طرف خشمي واحس اني هلفظها وترد تاني.
-بعد الشر عنك توف من خشمك الشر بره وبعيد، دول هبابة طراوه وهيروحو لحالهم وهتروق وتوبقي تمام، شفتش انت الوجع فضل ملازمني كد ايه وبعدها انسل كيف الشوكه مني وراح بفضل ربنا ولطفه بيا وبقيت زي الفل اهه قدامك،
متخافش واوعاك تيأس من رحمة ربك يانن عيني.
_اني مزعلانش عشان عيان ولا خايف من شي، اني والله كل اللي فيها اني خايف اموت واني على شوقي لبكرية قلبي اللي بقالي عمر بحالو محروم منها، لا عيني نضرتها من سنين ولا ععرف اخبارها غير بس من الشيخ حكيم، ونفسي تواقه لشوفة بتها، عايز اخدها فباطي واشمها واشوف فيها امها وهي صغيره..خايف اموت قبل مااكحل عيني بشوفة الحبيبه.
- ربنا يكتبلنا التلاقي، دست عالوجع بكلامك وفززت الجروح النايمه وصحيتها، ودلوك ليلنا هيكون اطول من العمر وراعيه الشوق، والعيون للصبح ماانها غفيانه.. الله يجازي ويكافي اللي كان السبب ويلوع قلبه ويسهر عيونه ويشغل فكره على حبايبه بحق وجع قلوبنا وحرماننا من ضنانا.
***************
-مالك يامليحه ياست الملاح قاعده مبرطمه ليه؟
_جعانه ياستي والمره الفقريه داي مانعه حد يمد يده عالوكل وهو عالنار ولازمن الكل ياكل مع بعضو واني شباعه جواعه وانتي خابره، وهي عتقفل عالوكل بالضبه والمفتاح ومعتخليش حد ياكل غيرها وغير عيالها.
_ يتقفل عليها باب القبر وهي حيه وتموت من الجوع والعطش ومتلاقي اللي يسد جوعها ولا يبل ريقها قادر ياكريم.
روحي قوليلها جدتي عايزه صحن سليقه جعانه وهاتيلها نايبها هتاكل بدري عنكم مش هتستنى الطبيخ يطيب، وتعالى اهنه كليه وسدي جوعك ياجدتي.
- له ياجده اني لو عميلت اكده مهتحطلكش غدا تاني ولا هتاكلي معانا
_ شبعانه انا ياعين جدتك، كلي انتي كني كلت وزياده.. ااااخ بس عاليد اللي بقت قصيره والقرش اتقطع منها، كان زماني محاوجاكيش لحد ولا مخليه نفسك فحاجه، بس اقول ايه مات الغالي وبقت شوفة القرش حسره عليا، وكل اللي مسموحلي بيه اللقمه وبق الميه ودمتم، يلا الحمد لله على كل حال محدش عياخد غير نصيبه وبس.
يلا ياجدتي قومي يلا عارفاكي بطنك طويله معتتحمليشي جوع كيف امك فزمانها، بس امك ياولداه اتعودت وبقت عامله كيف طباخ السم اللي مش عيدوقه.
نلتقي قريباً في الجزء الثاني
لقراءة الجزء الاول جميع الحلقات كامله